Gjermania vijon angazhimin dhe përpjekjet e saj për hapjen e bisedimeve të Shqipërisë me Bashkimit Europian. Këte shprehu vetë kancelarja Angela Merkel gjatë një bisede telefonike prej 45 minutash me kryeministrin Edi Rama.
Shefi i qeverisë bëri të ditur diskutimin me kancelaren dhe dakortësinë për negociatat.
“Gjatë një telefonate rreth 45 min me Kancelaren Merkel vendosëm të gjitha pikat mbi “i” për ecurinë e mëtejshme të përpjekjeve të përbashkëta për çeljen e negociatave për anëtarësim. Kancelarja rinënvizoi qëndrimin e Gjermanisë në mbështetje të Shqipërisë. Danke Angela”
Pak orë pas kësaj bisede, Parlamenti Europian votoi rezolutën për veton që Franca vendosi për të mos hapur negociatat me Shqipërinë dhe Maqedoninë e Veriut. Nga 578 eurodeputetë, 412 prej tyre votuan pro rezolutës qe ben thirrje per nisjen e bisedimeve për shkak të përmbushjes së reformave.
Dokumenti veren gjithashtu se vendimi negativ mund te sjelle destabilitet ne rajon.
Parlamenti thekson se duke mos mbajtur premtimet dhe angazhimet e veta ndaj të dy vendeve, Bashkimi Europian rrezikon të humbasë besueshmërinë e tij. Gjithashtu, beson fort se politika e zgjerimit të BE-së është një rrugë dykalimëshe, ku secila palë duhet të mbajë angazhimet e saj dhe përmbush premtimet e bëra në mënyrë që të vazhdojnë të jenë aktorë dhe partnerë të besueshëm në një mjedis gjithnjë e më të paqëndrueshëm.
Gjithashtu i bëhet thirrje Këshillit Europian të marrë përgjegjësinë që i takon dhe të veprojë sa më parë, sipas angazhimeve që ai vetë ka marrë.
Parlamenti europian nxit Këshillin Europian që në mbledhjen e tij të ardhshme më 12 dhe 13 dhjetor 2019 të marrë përgjegjësitë e tij dhe të gjejë një kompromis konkret, që lejon fillimin e negociatave të anëtarësimit me Shqipërinë dhe Maqedoninë. Gjithashtu aprovon nisjen e paralelisht të procesit të reformimit të metodologjisë së politikës së zgjerimit të BE-së, për sa kohë që kjo reformë nuk përdoret si mënyrë për të ndaluar procesin e zgjerimit dhe thekson se ky proces nuk përjashton hapjen e negociatave të anëtarësimit me Shqipërinë dhe Maqedonia e Veriut.
Parlamenti Europian me anë të këtij dokumenti beson se zhvillimi i procesit “screening” dhe hapja e negociatave do të ruajë dhe shtojë ritmin e reformave.
