Gazetari Ardit Hoxha, i ftuar në emisionin Quo Vadis në Vizion Plus, nën moderimin e Pranvera Borakajt, e cilësoi protestën e fundit qytetare si një thirrje të fortë për ndryshim, duke theksuar se shkaku kryesor i saj është keqqeverisja.
Sipas Hoxhës, protestat organizohen për të ndryshuar mënyrën e qeverisjes dhe jo për arsye të tjera dytësore.
“Protesta ka qenë një klithmë, një thirrje për ndryshim. Protesta bëhet për të ndryshuar qeverisjen. Problemi kryesor në një vend është qeverisja dhe keqqeverisja. Pastaj se sa problem është opozita, hajde dhe e diskutojmë”, u shpreh ai.
Gazetari argumentoi se largimi masiv i shqiptarëve gjatë viteve të fundit është një nga treguesit më të qartë të pakënaqësisë ndaj qeverisjes.
“Nëse ne nuk do të kishim gati 500 mijë shqiptarë që janë larguar nga viti 2013 e deri më sot, aty nuk do të kishim kaq shumë njerëz që do të kishin dalë në protestë. Do të ishin duke u marrë me punët e tyre. Nëse qeverisja do të ishte e suksesshme në mbështetjen e të rinjve, nuk do të kishte kaq shumë protestues”, tha Hoxha.
Në fund, ai vlerësoi faktin se protesta u zhvillua pa incidente, duke theksuar se mungesa e dhunës ishte një element pozitiv.
“Dhuna prodhon dhunë. Kjo protestë nuk ka pasur dhunë”, përfundoi gazetari.
