Avokati Leonard Karaj, i ftuar në emisionin Quo Vadis në Vizion Plus nën moderimin e Pranvera Borakajt, u shpreh se protesta e fundit shënon një ndryshim të rëndësishëm në mënyrën se si organizohen reagimet qytetare në Shqipëri.
Sipas tij, deri më tani protestat janë identifikuar kryesisht me partitë politike, ndërsa kjo protestë tregoi se edhe qytetarët mund të organizohen dhe të dalin në shesh pa qenë nën drejtimin e tyre.
“Në Shqipëri ishim mësuar që protestat i bënte ose PD, ose PS. Kjo protestë ia hoqi monopolin. Tani protestën mund ta bëjnë edhe qytetarët”, u shpreh Karaj.
Megjithatë, ai theksoi se protesta ka nevojë për një objektiv konkret dhe një drejtim të qartë.
“Kritika ime dashamirëse është që të ketë një synim, një qëllim. Qëllimi nuk mund të jetë abstrakt. Kërkesa ‘Rama jep dorëheqjen’ është abstrakte. Rama është problem, por nuk është zgjidhja. Ai i ka ngrysur ditët e veta”, deklaroi avokati.
Karaj shtoi se protestat nuk duhet të kenë domosdoshmërisht një afat kohor, por theksoi se ato nuk mund të vazhdojnë pa një organizim dhe drejtim të qartë.
“Jam gjithmonë me idenë që qëllimi nuk duhet të ketë afat, por gjithsesi ka një lloj limiti dhe duhet të formatohet kjo protestë. Nuk mund të ketë kaq shumë njerëz të ndryshëm që nuk kanë një kokë drejtuese”, përfundoi ai.
