Gjendja e shëndetësisë dhe prioritetet e investimeve në vend u bënë pjesë e një përplasjeje mes socialistit Ermal Pacës dhe gazetarit Ardit Hoxhës në emisionin QUO VADIS në Vizion Plus.
Paca u shpreh se shëndetësia ka nevojë për më shumë investime, por sipas tij duhet parë edhe rëndësia e imazhit të Shqipërisë në arenën ndërkombëtare.
Ndërkohë, Hoxha kundërshtoi duke u shprehur se qytetarët përballen ende me probleme konkrete në spitale, duke sjellë si shembull pacientët që marrin shërbim në korridoret e urgjencave.
Pjesë nga biseda:
Paca: A ka nevojë shëndetësia për më shumë? Patjetër që ka nevojë, por ama që të shkojmë te ajo duhet të kthehemi te kjo tjetra. E para, a ka nevojë imazhi i Shqipërisë që mos të prishet në sytë e botës? Kishim 25.000 veta. Ato 4.2 milion euro u dhanë ata, u dhanë ata protestuan.
Hoxha: Për ca të më intereson imazhi mua kur unë kam njerëz rrugëve të spitalit, korridorëve të spitalit? Tani flasim pak me këmbë në tokë.A ikim tani tek urgjenca e QSUT-së? Dhe nëse aty nuk ke njerëz që mjekohen në korridore…
Paca: Kurrë më përpara në këtë shtet nuk ka pasur një shërbim të tillë urgjence siç është sot. Kurrë nuk ka pasur investime të tilla sikur ka pasur sot.
Hoxha: Atë që po thua ti, unë nuk ta kundërshtoj. Unë po them këtë gjë, standartja është që njerëzit janë duke marrë mjekim në korridor.
Paca: Po mos merr raste individuale, mos merr raste… mund të ketë, mund të ndodhin. Ka nevojë për përmirësim? Patjetër që ka nevojë. Ka nevojë për më shumë investim? Patjetër.
/vizionplus.tv
