Presidenti i Republikës, Ilir Meta komentoi arritjen e marrëveshjes mes partisë Social-Demokrate dhe Bashkimit Demokratik për Integrim në Maqedoninë e Veriut.
Në “Facebook”, Meta e cilësoi këtë një hap pozitiv dhe tha se politika shqiptare duhet të mësojë nga ajo maqedonase. Sipas tij, mënyra më e mirë për ta nisur këtë është duke zbatuar marrëveshjen e 5 qershorit.
“Finalizimi i marrëveshjes për formimin e Qeverisë së re në Maqedoninë e Veriut është një tjetër hap pozitiv për forcimin e institucioneve demokratike dhe përparimin e reformave. Rritja e përfaqësimit të faktorit shqiptar në qeverisje, përfshirë dhe mundësinë e Kryeministrit shqiptar në të ardhmen, është tregues europianizues dhe vitalizues për forcimin e bashkëjetesës. Pas zgjedhjeve demokratike dhe konkurruese, fqinji ynë ecën me siguri të merituar për çeljen e negociatave me Bashkimin Europian. Duhet të mësojmë prej tyre dhe të kthehemi në shina sa më parë, duke nisur me respektimin e Marrëveshjes së 5 qershorit dhe plotësimin e gjithë kushteve të tjera. 🇦🇱🤝🇲🇰”
Kryeministri i Maqedonisë së Veriut do të jetë Zoran Zaev, ndërsa në 100 ditët e fundit para zgjedhjeve këtë vend do ta zërë një kryeministër shqiptar.
