Policia e Vlorës ka finalizuar operacionin e koduar “Siguria”, në kuadër të masave të shtuara për garantimin e rendit dhe sigurisë publike gjatë sezonit turistik. Gjatë operacionit u goditën tre raste që lidhen me armëmbajtjen pa leje dhe shitjen e lëndëve narkotike në qytetin e Vlorës dhe në zonat bregdetare.
Si rezultat i kontrolleve të ushtruara nga specialistët e Seksionit për Hetimin e Narkotikëve, në bashkëpunim me Forcën e Posaçme Operacionale, u arrestuan dy shtetas, ndërsa u sekuestruan një armë zjarri pistoletë, municion luftarak dhe sasi të lëndëve narkotike kokainë dhe kanabis.
Në pranga ra 33-vjeçari T.P., banues në Vlorë dhe me precedent penal në fushën e narkotikëve. Gjatë kontrollit në automjetin dhe banesën e tij, policia gjeti një pistoletë, një krehër arme, 44 fishekë të kalibrave të ndryshëm, si dhe sasi të lëndës narkotike kokainë të ndarë në doza, e dyshuar për shitje.
Gjithashtu u arrestua edhe A.C., 18 vjeç, banues në Vlorë, i cili u kap në Dhërmi me sasi kokainë dhe kanabis sativa. Sipas hetimeve paraprake, lëndët narkotike dyshohet se posedoheshin me qëllim shitjen në zonën bregdetare dhe në qytetin e Vlorës.
Policia bën me dije se kontrollet dhe operacionet për goditjen e veprimtarive të paligjshme do të vijojnë në të gjithë qarkun. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.
/vizionplus.tv
