Barbara Doda, sekretare e përgjithshme e Partisë Mundësia, tha se qytetarët nuk dalin në protestë për të rrëzuar qeverinë Rama, sepse opozita është shumë e dobët.
E ftuar në studion e QUO VADIS në Vizion Plus, ajo deklaroi se nuk mund të kërkohet largimi i Edi Ramës për të sjellë në qeveri Sali Berishën dhe Flamur Nokën.
Sipas Barbara Dodës, për sa kohë kemi Berishën, opozita nuk e fiton besimin e qytetarëve.
“Pse nuk dalin qytetarët në protestë? E di pse? Se zgjohen, shohin lajmet dhe thonë: Ore dua të dal, po për kë të dal? Të kërkoj dorëheqjen e Ramës, Ballukut dhe të sjellim Berishën e Nokën. Ne themi pse nuk dalin, por populli nuk del për të zëvendësuar këta që janë, për të vendosur të tjerë të korruptuar. Opozita ka të parin Berishën, i cili është vetë duke u hetuar. Për sa kohë kemi Berishën aty, opozita nuk e fiton besimin e qytetarëve. Si mund ta fitojë opozita besimin e qytetarëve kur përballë Berishës ka Edi Ramën”, tha Doda.
/vizionplus.tv
