Zëdhënësi i Shtabit Qendror të Iranit, struktura kryesore e komandës ushtarake në Iran, ka përcjellë një mesazh të ashpër ndaj asaj që e cilësoi si “superfuqia globale e vetëshpallur”.
Në një video-mesazh të publikuar sot nga mediat iraniane, Ebrahim Zolfaghari deklaroi: “Mos e quani humbjen tuaj një marrëveshje”.
Ai ngriti gjithashtu pikëpyetje mbi situatën e brendshme të kundërshtarit, duke thënë: “A ka arritur niveli i konfliktit tuaj të brendshëm deri në pikën që po negocioni me veten tuaj?”
Zolfaghari paralajmëroi se ndryshimet në rajon do të jenë të qëndrueshme vetëm përmes forcës ushtarake të Iranit.
“Nuk do të shihni më as investimet tuaja në rajon dhe as çmimet e mëparshme të energjisë dhe naftës, derisa të kuptoni se stabiliteti në rajon garantohet nga dora e fuqishme e forcave tona të armatosura. Stabiliteti vjen përmes forcës,” u shpreh ai.
Në përfundim, ai theksoi qëndrimin e palëkundur të Teheranit: “Dikush si ne nuk do të pajtohet kurrë me dikë si ju. As tani, as ndonjëherë.”/vizionplus.tv
