“Ne duam marrëdhëniet më të mira të mundshme me të gjithë fqinjët tanë dhe mes këtyre fqinjëve është edhe Shqipëria”.
Kjo ishte përgjigja e kryeministrit grek Mitsotakis, ndërsa u pyet për raportet mes tij dhe kryeministrit Edi Rama.
Por pavarësisht uljes se tensioneve mes Athinës dhe Tiranës pas lirimit të Fredi Belerit, kryeministri grek ka një tjetër kusht për Shqipërinë që të vijojë rrugën e saj drejt anëtarësimit në BE.
“Marrëdhëniet midis Greqisë dhe Shqipërisë, që ne duam të jenë shumë të mira, kalojnë nga respektimi i të drejtave të pakicës kombëtare greke të Shqipërisë. Çështja e të drejtave pronësore nuk ka dalë asnjëherë nga agjenda jonë. Ajo po rikthehet dhe ajo që ne do të bëjmë është të sigurojmë, me ndihmën edhe të Fredi Belerit në Parlamentin Europian, që të drejtat pronësore të bashkatdhetarëve tanë në Shqipëri të respektohen plotësisht. Dhe do të thoja se ky është një kusht i domosdoshëm që Shqipëria të vazhdojë të ecë në rrugën e saj europiane”, tha Mitsotakis.
Këto deklarata kryeministri grek i bëri pas hapjes së Panairit të 88 ndërkombëtar të Selanikut dhe fjalimit të tij për vizionin qeveritar deri në vitin 2027, vit në të cilin u shpreh se do të garojë sërish për një mandat tjetër./vizionplus.tv
