Kryetari i Partisë Demokratike, Lulzim Basha është ndalur te kriza ekonomike në vend dhe rritja e çmimeve të karburantit.
Basha i bëri thirrje qeverisë që të heqë urgjent taksën 240 lekë për litër nga karburanti. Në një dalje për mediat, ai tha se nëse qeveria merr këtë hap, do të kenë mbështetjen e opozitës.
Sipas Bashës, me këtë krizë çmimesh, do të ketë një ‘dimër’ të acartë ekonomik.
“ Vetëm këtu qeveria nuk do t’ia dijë, por Edi Rama ia mbath në Dubai, dhe porosit që në media të dalë përgjigja arrogante kundër qytetarëve. Këtu s’ka asnjë masë. Është ndër vendet më të pakta në botë, ku në raport me çmimin e naftës, ajo që merr qeveria është nga 45-60%. Kjo është arsyeja se pse çmimi është kaq i lartë. Nuk bëhet fjalë vetëm për automjetet, pasi karburanti është gjaku i ekonomisë, reflektohet te ekonomia. Pranvera po vjen, por po vjen një dimër i acarët ekonomik. Qeveria do që në zgjedhjet e ardhme, që 20 mijë lekshi t’i duket njerëzve 200 mijë leke. Duhet eliminim i taksës Rama për karburantin, apo reduktimin e taksës për akcizën, është emergjente. Si në pandemi, në çdo hap që njerëzit që paguajnë më pak për naftën, njerëzit të kenë mundësi për të blerë për fëmijët e tyre, ata do të kenë mbështetjen tonë. S’ka më kohë për justifikime. Një popull i vjedhur nuk ka më kohë të presë”, tha Basha.
