Presidenti i Republikës, Ilir Meta ka vlerësuar këtë të mërkurë me Dekoratën e lartë “Nënë Tereza”, Skënder Thaçin.
Meta gjatë ceremonisë solemne të zhvilluar në mjediset e Institucionit të Presidentit, i ka akorduar koordinatorit të shoqatës bamirëse “Albania-Austria Partnerschaft”, partner kryesor i bamirëses austriake Marianne Graf në të gjitha projektet humanitare në Shqipëri, Dekoratën e lartë me motivacionin:
“Për kontributin e dhënë për realizimin e një numri të konsiderueshëm projektesh për përmirësimin e infrastrukturës arsimore dhe shëndetësor, si dhe ndihmesën ndaj shtresave në nevojë në zona të ndryshme të Shqipërisë”.
Kreu i shtetit në fjalën e tij vlerësoi kontributin e Thaçi për punën dhe angazhimin e tij kushtuar arsimimit dhe kujdesit shëndetësor, mbrojtjes së të drejtave të fëmijëve, përmirësimit të infrastrukturës, kryesisht në zonat rurale si dhe projekteve në ndihmë të grave.
