Policia e Shtetit ka marrë të gjitha masat për mbarëvajtjen e e rendit dhe sigurisë në vend natën e ndërrimit të viteve.
Drejtori i përgjithshëm i Policisë së Tiranës Luigj Vathi në një lidhje live në Vizion Plus zbardhi planin e plotë, ku theksoi se në terren do të jenë të angazhuar 400 forca policie.
“Të angazhuar janë 400 forca policie, të rendit, të shqiponjave, rrugore dhe policia kriminale. Në sheshin Skënderbej ku ka koncert apo edhe lokalet e natës është marrë masa që policia të jetë e pranishme”, tha ai.
Vathi theksoi se policia në bashkëpunim me zjarrëfikësen kanë ushtruar kontrolle për mjetet piroteknike, për të cilat tha se nuk është konstatuar asnjë.
“Kemi dy javë që kemi një plan me zjarrëfiksen për mjetet pirroteknike. Nuk ka një prezencë të tyre, por shpresojmë që edhe natën e ndërrimit të viteve të mos ketë”, tha ai.
Vathi tha se masat janë marrë edhe në akset rrugore, ndërsa u bëri apel drejtuesve të mjeteve të mos konsumojnë alkool nëse janë në timon.
“Në të gjitha akset rrugore janë marrë masat, do ketë forca shtesë për mbarëvajtjen e qarkullimit për të marrë masat të mos ketë aksidente të rënda. U bëj apel shoferëve që të mos konsumojnë alkool se shkakton dëme”, tha Vathi.
