Partia Demokratike ka reaguar pas akuzave që Erion Veliaj ka hedhur ndaj Bashës për ndërtimin e katit shtesë.
Përmes një deklarate për mediat partia demokratike ka theksuar se tërbimi nga zbulimi i pazareve miliona euroshe tek Unaza e Re, ka bërë që propaganda e Edi Ramës dhe Erion Veliajt po rihedh në treg akuzat e vjetra dhe bajate për Lulzim Bashën, që sipas tyre ka ndërtuar një kat shtesë në kohën kur ishte Kryetar Bashkie.
“Për apartamentin e blerë që në vitin 2003, kohë përpara se të hynte në politikë, faktet janë këto:
- Lulzim Basha nuk ka ndërtuar asnjë kat shtesë.
- Para firmosjes së lejes së ndërtimit, Lulzim Basha ka marrë nga ILDKP aprovimin me shkresë zyrtare se nuk është në konflikt interesi.
- Leja e ndërtimit skadoi pa u përdorur kurrë.
Vala e sulmeve me shpifje të shëmtuara dhe akuza të vjetra bëhet për të mbuluar superskandalin e Unazës së Re dhe superskandalin e devijimit të Lumit të Lanës për t’i hapur rrugë pastrimit të parave nëpërmjet trafikantit ndërkombëtar të drogës, Edmond Bego.”
Gjithashtu në deklaratën e saj PD thekson se çifti më i korruptuar i politikanëve në Europë, është Edi Rama dhe Erion Veliaj, që kanë firmat e tyre në ndryshimin e Planit Urbanistik për të devijuar Lumin e Lanës në favor të krimit të organizuar.
