Kryeministri Edi Rama ka dhënë një intervistë për gazetën gjermane “BILD”, e cila vitin e kaluar publikoi përgjimet e bujshme, ku pretendohej ndërhyrja në rezultatin e zgjedhjeve të vitit 2017 në vendin tonë.
Duke folur për akuzat në adresë të Shqipërisë, si një nga vendet e nxehta që ka ndikuar në rritjen e numrit të të prekurve me koronavirusi në Gjermani, kreu i qeverisë theksoi se vendet e Ballkanit nuk paraqesin kërcënim për Gjermaninë apo ndonjë vend tjetër të Bashkimit Evropian.
Sipas tij, shumë vende të botës nuk raportojnë shifrën e saktë të të infektuarve me virus, ndërsa solli si rast Kinën, një vend me popullsi 1.3 miliard, e cila deklaron vetëm 5 të prekur në ditë.
“Unë nuk mendoj se shtetet e Ballkanit paraqesin kërcënim për Gjermaninë apo ndonjë tjetër në Bashkimin Europian dhe tekefundit shifrat flasin vetë. Kjo s’ka të bëjë me numrat e lartë apo me numrat që për këdo janë një kërcënim. Kur mendoj se Kina ka pesë raste sot dhe Shqipëria ka 100, atëherë kjo s’me duket se shkon. Dua të them që ka shumë lojëra me numrat. Ne kemi vendosur të jemi jashtëzakonisht transparentë në këtë drejtim. Sigurisht, pas hapjes, u përballëm me një sfidë që ishte më e madhe, sepse ka të bëjë edhe me sjelljen e të gjithë qytetarëve.”
I pyetur nëse a është Shqipëria pjesërisht fajtore për shifrat në rritje në Gjermani, Kryeministri tha se është diçka e pamundur.
“Unë kam prirjen të mos pajtohem me këtë, jo sepse unë duhet të mbroj vendin tim, por për shkak të aritmetikes së thjeshtë. Është e pamundur për ne, për sa u përket numrave, që të ishim në gjendje të ndikonim tek një vend i madh si Gjermania apo si rajon, të ndikonim në vende të mëdha si Franca apo vende të tjera në Europë. Le te themi që kjo është më tepër politikë sesa realitet…Kjo është politikë, sepse nuk ka Korona Ballkanike, nuk ka Mafia Ballkanike dhe as Tërmet Ballkanik ose Sëmundje Ballkanike. Por, politika ndonjëherë ka nevojë – dhe në ditët e sotme gjithnjë e më shumë – për këto njollat dalluese për të arritur te njerëzit. Sigurisht që sna vjen mire, por jemi mësuar me të. Nuk është hera e parë. Duhet të merremi me këtë stereotip dhe të përpiqemi të shpëtojmë prej tij.”
