Kreu i PD Sali Berisha është shprehur se e mbështet referendumin, një nga paralajmërimet që ka dhënë kreu i Partisë së Lirisë Ilir Meta.
Në një komunikim me gazetarët, Berisha tha se qeveria e Edi Ramës duhet të largohet sa më parë, tesa shtoi se me Metën nuk kanë folur për qeverinë teknike, paralajëmrim i dhënë nga ky i fundit ditën e djeshme.
Berisha tha se detyra e PD është përgatitja e zgjedhjeve të lira dhe të ndershme.
“Prej kohësh ne jemi shprehur për referendum. Jemi shprehur në disa takime. Vlerësoj edhe qëndrimin e Partisë së Lirisë për referendumet. Kushtetuta e ka humbur sensin e saj me marrjen e të gjitha pushteteve nga Edi Rama, de facto ajo ka rënë. Janë bërë ndërhyrje të shumëllojta në kushtetutë, të cilat i kanë privuar asaj zhdërvjelltësinë e parimeve të saj.
Shqipëria është i vetmi vend ku qytetarët nuk mund të flasin me votën e tyre. U bë një referendum në 1994, qeveria e humbi dhe ai ishte një zhvillim pozitiv për demokracinë shqiptare. Që nga ajo kohë referendum ka bërë PD-ja gjatë këtyre muajve. Janë një seri problemesh që duhet të marrin përgjigje me referendum.
Ne nuk kemi diskutuar por Edi Rama duhet të largohet një ditë e më parë. Pas largimit të kësaj qeverie, detyra më themelore është përgatitja e zgjedhjeve të lira dhe të ndershme. A do ngarkohet një qeveri teknike apo një qeveri ad-hoc, do ta zgjedhin forcat politike”, tha Berisha.
