Dimri i butë i këtij viti por edhe pandemia e cila ka sjellë kufizime të shumta të jetës normale, ka favorizuar dukshëm bletet.
Mjedisi ishte më i pastër e po ashtu kullotat kanë qene me te favorshme se vitet e kaluara. Kjo ka bërë që prodhimi mesatar i mjaltit të jetë deri në 12 kg për koshere, ndërkohë që me parë nuk ka shkuar më shumë se 10 kg.
Sipas ekspertëve cilësia e mjaltit do të jetë shumë herë më e mirë se çdo vit tjetër.
Në të gjithë qarkun e Korçës janë më shumë se 50 mijë familje blete, të cilat prodhojnë mesatarisht 600 ton mjaltë.
Edhe në bashkinë e Klosit është vënë re lulëzimi i këtij sezoni përsa i përket prodhimit të mjaltit.
Bletërritësi Besim Lami, thotë se këtë vit prodhimi do të jetë më i mirë se ai i sezonit të kaluar pasi lulet me të cilat ushqehet bleta, nuk janë dëmtuar nga shirat si vitin e kaluar.
Vjeljen e plotë të mjaltit bletarët pritet ta fillojnë nga fillimi i muajit korrik, kur dhe përfundojnë lulëzimin pemët apo lulet e ndryshme.
Ndërkohë në shkallë vendi janë 360 mijë familje blete të cilat arrijnë një prodhim prej rreth 4500 ton mjaltë.