Kryetari i Partisë Demokratike, Sali Berisha, përsëriti se opozita nuk do të marrë pjesë në komisionin e reformës zgjedhore e reformës territoriale. Në një konferencë me gazetarët, pas paralajmërimit të Partisë Socialiste, Berisha përsëriti se nuk do të ketë bashkëpunim me mazhorancën për asnjërën prej reformave.
“PD me gjithë këtë u angazhua në një proces, duke menduar se, në mbështetje të rekomandimeve të OSBE-ODIHR, do mund të bëheshin disa ndryshime për përmirësimin e kuadrit zgjedhor, me bindjen absolute se çdo ndryshim nuk bën të mundur zgjedhje të lira, për sa kohë Edi Rama të jetë në pushtet. Jo. E njëjta gjë për reformë territoriale. Por me aktin që kryen me Avokatin e Popullit, shkelmuan çdo parim të bashkëpunimit minimal. Çdo parim të bashkëpunimit minimal”, tha Berisha.
Sipas Berishës, zgjedhja e Avokatit të Popullit tregoi se PD nuk mund të bisedojë me kryeministrin Edi Rama. Gjatë konferencës me gazetarë, Berisha sqaroi se Partia Demokratike është përpjekur edhe pak orë para votimit që Endri Shabani të mos votohej, përfshi edhe bisedimet me ambasadorin e BE-së, Gonzato.
“Ky person kaq i pakarakter, gjer në darkën e ditës para votimit, përfaqësuesit tonë, i ka thënë se, unë nuk jam për Endri Shabanin, por këtë e vendos Rama. Kaq e vërtetë është kjo për ta ditë ju, saqë se çfarë ka biseduar ky me ambasadorin e BE-së nuk e di, por di mirë se ambasadori i BE ka komunikuar me Ramën, dhe Rama e ka kundërshtuar në mënyrë të prerë, ka komunikuar aty se, avokati i tij do të jetë Endri Shabani. Kjo është e tërë historia”, tha Berisha.
Mbetet për t’u parë nëse PD do ta çojë apo jo në Gjykatën Kushtetuese zgjedhjen e Endri Shabanit në postin e Avokatit të Popullit.
