Kryeministri Edi Rama ka prezantuar programin “Dyfisho ndërmarrjen tënde”, një nismë që synon t’u japë mundësi bizneseve të vogla dhe të mesme për të zgjeruar aktivitetin dhe për të dyfishuar kapacitetet e tyre.
Gjatë fjalës së tij në eventin e prezantimit, Rama tha se në zbatimin e këtij projekti janë përfshirë edhe ekspertë ndërkombëtarë, me qëllim që sipërmarrjet të kenë mbështetje për hartimin e projekteve të qëndrueshme dhe bindëse për financim.
Kryeministri vlerësoi bashkëpunimin me Bankën e Shqipërisë dhe bankat e nivelit të dytë, duke theksuar se roli i tyre do të jetë i rëndësishëm për suksesin e programit.
“Synimi ynë është t’u japim krah ndërmarrjeve të vogla dhe të mesme që të dyfishohen”, u shpreh Rama, duke shtuar se bankat do të kenë një rol të rëndësishëm në këtë proces.
Sipas tij, shumë biznese të vogla dhe të mesme hasin vështirësi në përgatitjen e planeve të biznesit, ndaj qeveria ka angazhuar edhe Programin e Kombeve të Bashkuara për Zhvillim (UNDP), për të sjellë ekspertë ndërkombëtarë që do të asistojnë sipërmarrjet.
Rama bëri të ditur se bizneset do të kenë në dispozicion një strukturë ndihmëse për të përkthyer idetë e tyre në projekte të realizueshme, ndërsa Ministria e Ekonomisë do të koordinojë bashkëpunimin mes institucioneve dhe subjekteve private.
Gjithashtu, ai njoftoi se është krijuar një platformë online ku bizneset mund të informohen për programin, të kontaktojnë ministrinë dhe të marrin përgjigje përmes një sistemi komunikimi elektronik.
Kryeministri theksoi se do të zhvillohen edhe takime në terren për të nxitur përfshirjen e sipërmarrjeve në këtë program, ndërsa falënderoi ministritë, Bankën e Shqipërisë dhe të gjithë aktorët e përfshirë në nismë.
/vizionplus.tv
