Operacion “blic” në Elbasan, arrestohen dy persona të dyshuar për lidhje me krimin

Një operacion i papritur u zhvillua pasditen e sotme nga Policia e Elbasanit në një biznes privat përgjatë aksit rrugor Elbasan–Ish-Metalurgjia, në fshatin Katund i Ri.

Rreth orës 15:30, forcat e rendit, të mbështetura edhe nga struktura të tjera policore, ndërmorën një aksion të mirëorganizuar në ambientet e një lokali të njohur në zonë, ku dyshohej se ndodheshin eksponentë të botës së krimit.

Paraprakisht mësohet se janë shoqëruar gjashtë persona, ndërsa dy prej tyre dyshohet se janë arrestuar, pasi kanë qenë subjekt hetimi si pjesë e rrjeteve kriminale në zonë.

Operacioni nisi me rrethimin e perimetrit përreth lokalit, duke garantuar siguri maksimale përpara ndërhyrjes brenda ambientit të biznesit.

Deri në këto momente, autoritetet policore nuk kanë bërë publike emrat e personave të arrestuar apo akuzat konkrete që rëndojnë mbi ta. Pritet që në orët në vijim të ketë një njoftim zyrtar nga Policia e Shtetit ose Prokuroria e Elbasanit.

/vizionplus.tv