Një delegacion me ekspertë gjermanë ka zhvilluar një vizitë së fundmi në Tiranë për të diskutuar nga afër për procesin e njohjes së patentave shqiptare në Gjermani. Ambasada gjermane në Tiranë njoftoi se ekspertët kanë mbetur të kënaqur nga përparimi i Drejtorisë së Përgjithshme të Transportit Rrugor.

 

“Përparime në rrugën e procesit të njohjes së patentave shqiptare në Gjermani. Në një vizitë informative në Tiranë, Drejtuesi i Departamentit për Qarkullimin Rrugor në Ministrinë Federale për Qarkullimin dhe Infrastrukturën Digjitale, zoti Guido Zilke si dhe Drejtuesja e Referatit përgjegjës, zonja Renate Bartelt-Lehrfeld, u informuan para pak ditësh mbi zhvillimet aktuale në Shqipëri në sektorët e sigurisë rrugore dhe provimeve për patentat. Përpjekjet intensive të Shqipërisë në vitet e fundit për të sjellë procedurën e lëshimit të patentave në stadin më modern teknik dhe shkencor, përshëndeten shprehimisht nga Gjermania. Gjermania njeh përparimet e dukshme në këtë fushë.”

 

Ambasada theksoi në “Facebook” se që patentat shqiptare të njihen në Gjermani duhet të japin aprovimin e tyre 16 lande federale. Po ashtu, selia diplomatike bëri të ditur lajmin se së shpejti do të mbërrijnë në Tiranë ekspertë gjermanë për sigurinë rrugore.

 

“Me veprimtaritë pozitive të vlerësuara të Drejtorisë së Përgjithshme të Transportit Rrugor, nga këndvështrimi gjerman, është bërë një hap tjetër i rëndësishëm. Sidoqoftë, duhet të ndiqen edhe masa të mëtejshme për të përmirësuar sigurinë rrugore në Shqipëri. Gjermania do të mbështesë intensivisht Shqipërinë në përpjekjet e saj për të ulur numrin e aksidenteve. Delegacioni ka njoftuar se së shpejti do të dërgojë një ekspert të sigurisë rrugore në Tiranë.”

 

Kryeministri Edi Rama tha pak ditë më parë se po ecet në rrugën e duhur për t’u njohur patentat shqiptare në shtetin gjerman. Por ai kërkoi durim sepse sipas tij, ky proces do të marrë kohë.

Leave a Reply

Your email address will not be published. Required fields are marked *