Partia Demokratike do të shkojë në zgjedhje për kryetar më 23 maj, ku kandidati i vetëm është Sali Berisha.
I ftuar në studion e “Quo Vadis” në Vizion Plus, anëtari i Kryesisë së PD-së, Grigels Muçollari, ka folur për këtë moment në Partinë Demokratike.
I pyetur nga moderatorja Pranvera Borakaj se përse ndaj Sali Berishës nuk aplikohet “Neni Basha”, Muçollari tha se PD nuk i ka humbur zgjedhjet, pasi ato janë manipuluar.
Pjesë nga biseda:
Borakaj: A duhet të ishte zoti Berisha i përjashtuar nga statuti?
Muçollari: Jo.
Borakaj: Neni Basha.
Muçollari: Ai nuk është “Neni Basha”.
Borakaj: Zoti Berisha e ka quajtur kështu.
Muçollari: Bëhet fjalë për një statut, për një nen të drejtës zgjedhore. Për sa kohë që OSBE-ja dhe raportet flasin për përdorim të grupeve kriminale, një proces absurd, mendoj se nuk do të ishte fort e drejtë zbatimi i nenit për zgjedhje të padrejta.
Borakaj: Edhe në 2021 pretenduat se ju vodhën zgjedhjet, edhe zotit Lulzim Basha nuk duhet t’i kërkohej të largohej.
Muçollari: Zoti Basha nuk u largua.
Çifligu: Zgjedhje apo referendum do të jetë 23 maji?
Muçollari: Është proces rikonfirmimi.
