Një veprim kaq i vogël mjafton për të ndezur këtu një vatër të madhe zjarri dhe për të shkaktuar më pas një dëm të konsiderueshëm mjedisor. Vetëm në vitin 2025, në vend ishin aktive 282 vatra zjarri, të cilat dogjën një sipërfaqe prej afro 15 mijë hektarësh. Sipas Agjencisë Kombëtare të Pyjeve, shkaktarët kryesorë të këtyre vatrave ishin aktiviteti njerëzor dhe temperaturat ekstreme, ndërsa vlera e dëmit e tejkalon shifrën e 7 miliardë lekëve.
Pisha, ahu, dushku, lisi, por edhe bredhi dhe gështenja u dogjën masivisht vjet. Që këto sipërfaqe të djegura të rikthehen në jetë, do të duhen dekada.
“Shumë vite, dekada, pyjet që na janë djegur në njësinë Skërnderbegas kanë qenë pyje prej 7-8 dekadash”, tha Besian Ajazi, kryetar i Bashkisë së Gramshit
Një nga bashkitë më të prekura vitin e shkuar nga zjarret ishte ajo e Gramshit. Por rigjenerimi i zonave të shkrumbuara gjatë verës së 2025 nuk ka nisur ende.
“Gjatë kësaj periudhe ne kemi mbjellë më shumë se 7-8 hektarë pyje, në bashkëpunim me aktorë lokalë, por edhe kombëtarë. Vetëm gjatë periudhës janar-mars kemi mbjellë më shumë se 15 mijë rrënjë, ndëra gjatë periudhës 2025-2026 janë afro 35 mijë fidanë të mbjellë në zona të prekura vite më parë nga zjarret. Ndërsa për zjarret e rëna vitin e kaluar jemi në fazën që sapo na ka ardhur nga ministria e linjës miratimi i planit të shfrytëzimit në këto zona dhe për pak ditë do të nisim edhe procedurën e ankandit, që do të thotë largimi i druve të djegur nga masivet pyjore dhe më pas do të bëjmë mbjelljen e fidanëve të rinj”, shtoi Ajazi.
Për mbjelljen e fidanëve të rinj në këto sipërfaqe të djegura bashkitë zakonisht pranojnë dhurime nga sipërmarrës.
“Bashkia ka bashkëpunuar me operatorë ekonomikë, me sipërmarrës të ndryshëm, në disa raste ne kemi financuar, në raste të tjera kemi bashkëfinancuar. Pjesa më e madhe e tyre është bashkëpunim i bashkisë me dhurues, vijnë si donacione”, tha kryebashkiaku i Gramshit.
Agjecia Kombëtare e Pyjeve thotë se viti 2025 ishte ndër më problematikët për zjarret në Shqipëri krahasuar me dekadën e fundit. Sipërfaqja e djegur dhe numri i zjarreve janë ndër më të lartat që nga viti 2017. Dëmet më të theksuara janë evidentuar në zonat me pishë, për shkak të ndezshmërisë së lartë të halave dhe rrëshirave, të cilat favorizojnë përhapjen e shpejtë të flakëve dhe përkeqësojnë gjendjen e ekosistemit pyjor.
