Mbledhja e gjatë e Këshillit Politik që u mbajt në nisje të kësaj jave nuk rezultoi produktive. Mazhoranca, opozita parlamentare dhe ajo jashtë parlamentit nuk gjetën dakordësi për listat e hapura.
Por Gazment Bardhi, që përfaqësoi në këtë mbledhje PD, bëri me dije se përgjatë gjithë takimit ka kërkuar nga Edi Rama një datë se kur do të miratohet marrëveshja e 5 qershorit.
Ai tha për mediat se kjo marrëveshje duhet të votohet në Parlament e pandryshuar.
“Ne i kemi dhënë kohë Kryeministrit dhe kryetarit të Partisë Socialiste që të na informojë, zyrtarisht, se kur do të kalojë për miratim, pa ndryshime, ashtu siç është zotuar në dy marrëveshje politike, në 14 janar dhe në 5 Qershor, marrëveshja apo Kodi që ne kemi bërë, në kuadër të zbatimit të Marrëveshjes së 5 qershorit. Besoj se edhe ju e dini që nuk ka një datë ende se kur do të miratohet nga Parlamenti marrëveshja e dakordësuar mes palëve dhe që është produkt i një pune 6 mujore e përfaqësuesve tanë dhe i përfaqësuesve të Partisë Socialiste në Këshillin Politik. Për këtë i kemi dhënë kohë Kryeministrit dhe po presim një përgjigje prej tyre se kur miratohet pa ndryshime të tjera të njëanshme që minojnë marrëveshjen dhe dakordësinë e parë, marrëveshja e 5 qershorit.”
Kryeministri Edi Rama tha më herët se është e vështirë të gjendet konsesus mes palëve sepse të gjithë i duan të gjitha. Thirrjen ai ja drejtoi opozitës brenda Parlamentit për të bërë lëshime dhe për t’u treguar më konstruktivë. Sipas Ramës, diskutimet do të vijojnë.
