Ministri teknik i Drejtësisë Gazment Bardhi ngre shqetësimin se mungojnë 300 byzylykë për mbikëqyrje elektronike, të cilat do të përdoren tek personat që kanë masa ndaluese. Përmes një letre drejtuar bashkimit të operatorëve, në mars të këtij viti, sipas Bardhit, ministria ka marrë në dorëzim 300 byzylykë të mbikëqyrjes elektronike, së bashku me kartat sim, me një vlerë prej afro 2 milionë euro.
Më tej, në letër shkruhet se këto pajisje i kanë kaluar për administrim sallës së mbikëqyrjes elektronike pranë drejtorisë së përgjithshme të shërbimit të provës. Por, sipas ministrit teknik ky dorëzim është bërë pa kryer procedurat ligjore të kalimit. Bardhi ka paralajmëruar se në rast të mos kthimit të 300 byzylykëve, çështja do t’i referohet prokurorisë.
Ndërkohë i menjëhershëm ka qenë edhe reagimi i kompanisë se kontraktuar për mirëmbajtjen e sistemit elektronik. Ajo sqaron se operatorët kanë dorëzuar mallin në përputhje me detyrimet e kontratës.
