Zëdhënësja e Ministrisë së Jashtme ruse, Maria Zakharova, deklaroi sot se vetëm një “i çmendur” mund të propozojë një ndalim të përhershëm të importeve të naftës nga Rusia, siç po planifikohet nga Bashkimi Evropian.
Sipas zyrtarëve evropianë dhe një dokumenti të parë nga Reuters, BE-ja pritet të paraqesë një propozim ligjor për ndalimin e përhershëm të importeve të naftës ruse më 15 prill, tre ditë pas zgjedhjeve parlamentare në Hungari.
“Prania e trupave britanike do ta zgjasë luftën”
Duke komentuar edhe mundësinë e dislokimit të trupave britanike në Ukrainë, Zakharova u shpreh se një veprim i tillë nuk do t’i jepte fund luftës, por do ta zgjaste atë.
Kujtohet se Franca dhe Mbretëria e Bashkuar kanë deklaruar se janë të gatshme të dërgojnë trupa në Ukrainë pasi të arrihet një armëpushim në luftën me Rusinë.
Ministri britanik i Mbrojtjes, John Healey, shkroi në një artikull në shtypin e fundjavës: “Dua të jem ministri i Mbrojtjes që do të dislokojë trupa britanike në Ukrainë – sepse kjo do të thotë se kjo luftë më në fund ka përfunduar”.
“Perceptim i gabuar”
Duke iu përgjigjur deklaratës së Healey, Zakharova tha para gazetarëve: “Në kundërshtim me perceptimin e gabuar të Healey, vendosja e trupave britanike në Ukrainë nuk do të nënkuptojë fundin e luftës, por përkundrazi zgjatjen e konfliktit dhe rritjen e rrezikut të një përballjeje ushtarake në shkallë të gjerë me përfshirjen e shumë shteteve”.
Ajo përsëriti paralajmërimin e Moskës se çdo trupë e huaj në territorin ukrainas do të konsiderohet objektiv legjitim nga Rusia.
