Në prag të fillimit të sesionit te ri parlamentar instituti I studimeve politike ka nxjerrë raportin e monitorimit të Kuvendit gjatë periudhës janar – korrik 2022.
Në këtë raport theksohet se 3 aktet më të rëndësishme të parlamentit ishin: zgjedhja e Presidentit të ri të Republikës, ndryshimi i kushtetutës lidhur me mandatet e organeve të vetingut dhe funksionimi i komisionit hetimor për inceneratorët.
ISP thekson se gjatë këtij sesioni u vu re se “klima e tensionit, arroganca e shumicës parlamentare dhe sjellja agresive e opozitës dobësuan cilësinë e debatit parlamentar dhe vështirësuan moderimin e punimeve të Kuvendit.”
Ndërsa në lidhje me situatën në PD, ISP vëren se “Kriza në PD ka pasur ndikim në të gjithë aktivitetin, performancën dhe jetën parlamentarë, sidomos në agjendën e opozitës dhe të deputetëve në mënyrë individuale. Kuvendi nuk ka një sistem efektiv që bën verifikimin e legjitimitetit të grupeve parlamentare dhe mazhoranca krijoi përshtypjen se dëshiron të përdor shumicën e saj për të diktuar opozitën.”
ISP ka monitoruar edhe nivelin e efikasitetit të deputetëve duke vlerësuar me nivelin më të lartë Jorida Tabakun (PD) dhe Erion Braçen (PS).
Sipas ISP disa nga deputetët e rinj patën rritje të vizibilitetit dhe aktivitetit parlamentar, ndërkohë që së paku 17 deputetë nuk arritën dot të mbajnë një fjalim në parlament.
