Ashtu sikurse ishte paralajmëruar, miliarderi Jeff Bezos është zyrtarisht pjesë e aksioneve të Liverpoolit.
Bosi i Amazon, bashkë me sipërmarrës të tjerë të famshëm botërorë, përfshirë ish-ekzekutivin e Facebook, Eduardo Saverin, dhe familjen Mittal, kanë blerë një pjesë të vogël të aksioneve në Liverpool nga Fenway Sports Group, i cili mbetet sidoqoftë aksionari kryesor i skuadrës së famshme angleze.
“Liverpool është ndërtuar gjithmonë duke menduar përtej një sezoni të vetëm dhe duke marrë vendime duke pasur parasysh interesat afatgjata të klubit. Kjo qasje vazhdon të tërheqë interesin e investitorëve dhe liderëve të biznesit të respektuar në të gjithë botën”, thuhet mes të tjerash në komunikatën zyrtare të klubit të Liverpoolit.
Palët nuk komunikuan shifrën e saktë të aksioneve të blera nga Bezos dhe partnerët e tij, megjithëse mediat e mëdha botërore njoftuan se bëhet fjalë për 1/3 e totalit, pra rreth 33%.
Klubi i Liverpoolit u ble nga John Henry në vitin 2010 për 500 milionë dollarë dhe sot vlerësohet 7 miliardë dollarë. Sipas llogarive, në këtë rast, miliarderi i Amazon dhe kolegët e tij kanë shpenzuar më shumë se 2 miliardë dollarë për t’u futur në Premier Ligë.
Forbes e vlerëson pasurinë neto të Jeff Bezos në 271.1 miliardë dollarë, ndërsa aksioneri tjetër, Eduardo Saverin, me 33 miliardë dollarë.
/vizionplus.tv
