Kanë kaluar dy vite nga ndarja tragjike nga jeta e 16-vjeçarit shqiptar Lorenzo Çela, i cili humbi jetën pas një aksidenti të rëndë në Itali.
Pavarësisht dhimbjes së jashtëzakonshme, familja vendosi të dhuronte organet e të miturit. Transplantimi i organeve të tij u krye natën mes 12 dhe 13 gushtit 2024, në Spitalin Civil të Brescias.
Në këtë përvjetor të dhimbshëm, nëna e 16-vjeçarit ka bërë një kërkesë prekëse. Ajo dëshiron të njohë personat që sot jetojnë falë organeve të djalit të saj, edhe pse e di se një takim i tillë mund të jetë i vështirë për t’u realizuar.
“Sot do të doja të shprehja një dëshirë dhe t’u kërkoja marrësve të organeve të djalit tim Lorenzo, edhe pse është pothuajse e pamundur, që të takoheshim”, shkruan ajo në një postim të bërë së fundmi në rrjetet sociale.
Familja e përshkruan dhurimin e organeve si një mënyrë që, edhe pas vdekjes së parakohshme, një pjesë e Lorenzos të vazhdojë të jetojë te persona të tjerë.
Edhe xhaxhai i 16-vjeçarit ka ndarë dhimbjen e tij, duke e kujtuar Lorenzon si një djalë të dashur nga të gjithë dhe si një figurë të rëndësishme për familjen.
“Ti ishe djali që të gjithë donin, ti ishe dashuria e familjes sonë. Tani në familjen tonë ka vetëm heshtje dhe errësirë. Xhaxhai të do si gjithmonë”, shkruan ai mes dhimbjes.
Aksidenti tragjik ndodhi në një mbrëmje të gushtit 2024, në rrugën Via Mantova, në kufirin mes Lonato dhe Castiglione delle Stiviere. Lorenzo udhëtonte së bashku me të dashurën e tij dhe nënën e saj kur u përfshi në aksident.
16-vjeçari pësoi plagë të rënda, të cilave nuk mundi t’u mbijetonte. /vizionplus.tv
