Ministria e Mbrojtjes njofton se deri në orën 09:00 në të gjithë territorin e vendit janë raportuar 31 vatra zjarri. Prej tyre, 5 mbeten aktive, ndërsa 5 të tjera janë nën mbikëqyrje.
Për përballimin e situatës janë angazhuar 319 forca operacionale dhe 24 automjete zjarrfikëse. Në mbështetje të operacioneve në terren janë vendosur edhe 80 efektivë të Forcave të Armatosura dhe dy helikopterë të Forcës Ajrore.
Situata më problematike vijon në zonën e Dajtit, në drejtim të Qafë-Priskës, përballë Farkës, ku zjarri mbetet aktiv. Operacioni do të vijojë edhe sot me 15 forca zjarrfikëse, 9 forca të AdZM-së dhe 20 efektivë të Forcave të Armatosura. Sipas autoriteteve, nuk raportohet rrezik për zonat e banuara.
Në qarkun Dibër, aktive mbeten vatrat në Vajkal, Lundre dhe Ballenjë. Ndërkohë, zjarri në Sllatinë është izoluar dhe po mbahet nën mbikëqyrje. Në Vajkal janë angazhuar 38 forca të MZSH-së dhe 30 efektivë të FA-së, ndërsa në Lundre pritet të angazhohen 20 efektivë të Forcave të Armatosura. Edhe në këto zona nuk raportohet rrezik për banesat.
Në brezin Bershi–Kurdari–Patinë, në bashkinë Klos, vijojnë të jenë aktive dy vatra zjarri, të shtrira në një sipërfaqe prej rreth 4 hektarësh.
Në qarkun Korçë, situata në zonën e “Qafës së Lugut”, Vithkuq, raportohet nën kontroll dhe po mbahet nën mbikëqyrje. Në Elbasan, vatrat në malin e Dardhës dhe malin e Qukësit vijojnë gjithashtu të monitorohen, pa paraqitur rrezik për zonat e banuara.
Ndërkohë, zjarri në fshatin Zallë, Fushë-Krujë, në qarkun Durrës, është shuar plotësisht. Flakët u vunë nën kontroll gjatë ditës së djeshme falë ndërhyrjes së strukturave vendore dhe 30 efektivëve të Forcave të Armatosura.
Ministria e Mbrojtjes bën me dije se disa vatra të tjera të raportuara gjatë 24 orëve të fundit në qarqet Tiranë, Durrës, Berat, Shkodër, Gjirokastër, Lezhë, Vlorë dhe Korçë janë shuar plotësisht ose nuk paraqesin rrezik.
Agjencia Kombëtare e Mbrojtjes Civile vijon monitorimin e situatës në të gjithë vendin, në koordinim me prefekturat, bashkitë dhe strukturat e sistemit të Mbrojtjes Civile.
Autoritetet deklarojnë se kapacitetet operacionale mbeten në terren dhe në gatishmëri për ndërhyrje, me prioritet mbrojtjen e jetës, banesave dhe pasurisë së qytetarëve./vizionplus.tv
