Çështja e kufirit detar mes Shqipërisë dhe Greqisë pritet të përfshihet në diskutimet mes ministrit grek të Mbrojtjes Nikos Dendias dhe zyrtarëve shqiptarë. Ai pritet të zhvillojë takime të nivelit të lartë në Tiranë për çështjet e mbetura pezull mes dy vendeve.
Sipas programit të vizitës, Dendias fillimisht do të mbërrijë në Ministrinë e Mbrojtjes, ku do të takohet me homologun e tij shqiptar, Ermal Nufi, me të cilin pritet të diskutojë mbi bashkëpunimin dypalësh në fushën e mbrojtjes dhe sigurisë rajonale.
Më pas, ministri grek do të pritet në një takim nga kryeministri Edi Rama, ku gjithashtu parashikohet të zhvillohet një drekë pune në rezidencën qeveritare.
Në vijim të vizitës, Dendias do të zhvillojë edhe një takim me Kryepeshkopin e Tiranës, Durrësit dhe të gjithë Shqipërisë, Joanin, duke përmbyllur kështu agjendën e tij në Shqipëri.
