Mesazhi nga Imzot Joan Pelushi: Eksodi i shqiptarëve gati biblik, nuk mund të duash Zotin pa dashur vendin tënd

Imzot Joan Pelushi, mitropolit i Korçës, inë një intervistë për Vizion Plus ka treguar simbolikën e festës së Pashkëve ortodokse dhe ka ndarë një mesazh për të gjithë shqiptarët.

Çfarë simbolizon Pashka për besimtarët ortodoksë?

“Pashka është përkujtimi i kryqëzimit dhe i ngjalljes së Zotit, është qendra e festimeve liturgjike të Kishës dhe e doktorinës së Kishës. Pashka është parimi i veprës shpëtimtare të Krishtit dhe fillimi i veprës sonë, sepse Zoti hapi rrugë për gjithësecilin nga ne, që të marrim pjesë në këtë rrugëtim. Të kalojmë nga errësira në dritë dhe nga vdekja në jetë. Andaj dhe Pashka është një festë e gëzuar dhe një festë që tregon çlirimin e njeriut nga çdo lloj pasioni i errësirës dhe pastrimi i zemrës dhe shpirti”, tha ai.

A është ky mesazhi kryesor i kësaj feste të madhe?

“Po, ky është. Fitorja e Zotit, sepse vdekja është armik i përbashkët, prandaj dhe kjo fitore është universale”, tha ai. “Fitoren e  Krishtit mbi vdekjen është fitore e të gjithëve, sepse vdekja, siç e thashë, është armik i përbashkët të gjithë njerëzve, prandaj kjo festë sjell aq shumë shpresë, gëzim, dhe ngushëllim”, shtoi ai.

Në 2023 a duhet të jenë mesazhet e shpresës që përcillen në këtë ditë edhe për problemet ekonomike dhe sociale me të cilat përballet Shqipëria, por edhe bota?

“Ka një jetë shpirtërore, por ka dhe një jetë trupore dhe këto nuk mund të ndahen nga njëra-tjetra, por Kisha është fokusuar më shumë në planin shpirtëror për një arsye shumë themelore, për ta luftur të keqen në rrënjë. Nëse do duam një shoqëri me drejtësi, si mund të bëhet e drejtë nëse s’do kemi njerëz të drejtë”, theksoi ai duke shtuar se nëse komuniteti rrethohet nga dashuria shumë probleme sociale e financiare zhduken.

Cili është apeli i Kishës për fenomenin e largimit masiv nga Shqipëria?

“Ne e kemi përsëritur vazhdimisht që duhet ta duam vendin tonë, sepse është e pamundur të duash Zotin e të mos duash vendin tënd. Ta duash vendin tënd do të thotë të japësh gjithçka që mundesh për ta ndihmuar. Kjo nuk do të thotë që gjithë njerëzit të qëndrojnë këtu, ka njerëz që ndoshta kanë nevojë për të shkuar diku, ne nuk mund të gjykojmë çdo njeri në veçanti. Thirrja e Kishës është që të përpiqemi për të përmirësuar jetën tonë këtu. Ne nuk mund ta realizojmë këtë nëse nuk do të ketë një lloj ndriçimi shpirtëror, prandaj dhe fokusimi është në këtë drejtim, sepse nëse ne do ndriçohemi, do bëhemi njerëz zemërdhembshur, të drejtë, padyshim gjithë shoqëria do ndryshojë. Duke ndryshuar shoqëria do bëhet një vend ku jetohet më lehtë e vetëm në këtë mënyrë ne mund t’a realizojmë bllokimin e këtij eksodi gati biblik”, theksoi ai.