Presidenti i Libanit ka bërë thirrje për negociata të drejtpërdrejta me Izraelin, si pjesë e një propozimi për t’i dhënë fund konfliktit në rritje me Hezbollahun, ndërsa kritikoi ashpër grupin e mbështetur nga Irani për tërheqjen e vendit në një luftë më të gjerë rajonale.
Një zëdhënës i Presidentit Joseph Aoun i tha BBC-së se Libani ishte gati të negocionte, por jo për sa kohë që vendi mbetet nën sulmin izraelit.
Zyrtarët izraelitë kanë treguar pak shenja mbështetjeje për negociatat dhe qeveria nuk bëri komente.
Sipas planit katërpikësh të presidentit libanez, një “armëpushim i plotë” do të përkonte me çarmatimin e Hezbollahut dhe ndihmën ndërkombëtare për Forcat e Armatosura Libaneze për t’i ndihmuar ato të rimarrin kontrollin e “zonave të tensionit”.
“Dhe njëkohësisht, Libani dhe Izraeli të fillojnë negociata të drejtpërdrejta nën sponsorizimin ndërkombëtar, me qëllim zbatimin e planit të lartpërmendur”, thuhet në një deklaratë.
Aoun tha se lufta kishte lënë një bilanc shkatërrues në Liban, me më shumë se 700,000 njerëz të zhvendosur, përfshirë 200,000 fëmijë, dhe qindra të vrarë në sulmet izraelite gjatë nëntë ditëve të fundit, sipas Kombeve të Bashkuara.
“Disa prej tyre janë në rrugë. Ata nuk kanë strehë dhe as nevojat më themelore të jetës”, tha ai.
Presidenti gjithashtu kritikoi ashpër Hezbollahun, duke akuzuar milicinë myslimane shiite dhe lëvizjen politike se po veprojnë kundër interesave kombëtare të Libanit.
Duke iu referuar Hezbollahut si një “fraksion i armatosur”, Aoun tha se ai “nuk u jepte peshë interesave të Libanit apo jetës së popullit të tij” dhe dëshironte kaos.
Komentet vijnë pas deklaratës së qeverisë javën e kaluar se operacionet ushtarake të Hezbollahut ishin të paligjshme, megjithëse shtetit aktualisht i mungon kapaciteti për ta çarmatosur grupin vetë.
Javën e kaluar, kryeministri izraelit Benjamin Netanyahu iu drejtua qeverisë libaneze drejtpërdrejt në X, duke shkruar: “Është përgjegjësia juaj të zbatoni marrëveshjen e armëpushimit dhe është përgjegjësia juaj të çarmatosni Hezbollahun”.
Joshua Zarka, ambasadori i Izraelit në Francë, tha të martën se Bejruti nuk kishte ndërmarrë hapa domethënës drejt çarmatosjes së grupit.
“Në këtë fazë, nuk jam në dijeni të ndonjë vendimi për të hyrë në negociata për t’i dhënë fund kësaj lufte”, tha ai.
Edhe pse u ra dakord për një armëpushim midis Izraelit dhe Libanit në nëntor 2024 nën ndërmjetësimin e SHBA-së dhe Francës, ai kryesisht nuk ka arritur të zbatohet.
Izraeli ka vazhduar sulmet pothuajse të përditshme në Liban, duke akuzuar Hezbollahun se po përpiqet të riarmatoset.
