Vonesat për formimin e qeverisë së re pas zgjedhjeve parlamentare të 11 qershorit në Kosovë, mund të ngadalësojnë procesin e liberalizimit të vizave. Njëkohësisht procesi mund të ngecë edhe në Bashkimin Europian, ku besohet se te disa vende anëtare të BE-së nuk ka shumë vullnet që Kosovës t’i hiqen vizat.
Profesori i së Drejtës Europiane Emrush Ujkani është shprehur se, “mungesa e krijimit të qeverisë së re nënkupton faktin se është e pamundur që të shkohet me ratifikimin e Demarkacionit me Malin e Zi, si dhe të bëhen hapat konkret në luftimin e korrupsionit”. Ai ka shtuar se këto janë kriteret që duhet të plotësohen, që t’i hapë rrugë liberalizimit të vizave.
“Ne urojmë që të mos ketë ngërç polik, por rezultatet preliminare që dalin nga zgjedhjet, nuk janë optimiste në raport më atë se mund të kemi një formim të Qeverisë se re në afat shkurtër”, thekson Ujkani.
NdërkohBesa Shahini, njohëse e integrimeve evropiane, procesin e liberalizimit të vizave për Kosovën e konsideron më të komplikuar. Ajo thotë se ky proces ka ngecur në Bashkimin Evropian e jo në Kosovë.
“Teknikisht, për të zhbllokuar procesin e liberalizimit të vizave, duhet të kalohet Marrëveshja për demarkimin e kufirit me Malin e Zi dhe duhet të luftohet korrupsioni”, thotë ajo. “Por, edhe nëse ndodhin këto të dyja, procesi zhbllokohet në Parlamentin Evropian, pastaj kalon në Këshill të Ministrave, e unë besoj që do të jetë i bllokuar prapë pasi vendet e BE-së nuk janë të interesuara që në këtë fazë t’i japin mundësi Kosovës për liberalizimin – për shkak të rrezikut për migrim”.
Çështja e liberalizimit të vizave për Kosovën mbetet një nga temat dhe çështjet më të diskutuara viteve të fundit. Premtimet për liberalizimin e vizave për Kosovën nga liderët politikë dhe përfaqësues të institucioneve të vendit ishin bërë që nga viti 2010. /REL/
