Prishtina dhe Beogradi duket se po përballen me një tjetër ngërç në procesin e dialogut ndërsa në Kosovë janë shtuar zërat se vendi gjendet nën trysninë e politikave provokuese. Zëvendës kryeministri, Besnik Tahiri në një intervistë për “Vizion Plus” shprehet se Brukseli zyrtar duhet të reflektojë thellësisht mbi efektivitetin e bisedimeve mes palëve.
BESNIK TAHIRI
ZV/KRYEMINISTER I KOSOVES
“Trupat që janë gjetur në shumë varreza janë e vërteta mbi Kosovën se kush ka qenë agresori e kush viktima. Një dialog që prej një dekade po ndodh pa efekte të sakta. Kosova sot është vendi i vetëm që nuk lëviz lirshëm, të gjitha vendet evropiane e kanë liberalizimin. Vetëm ne nuk e kemi. Ne presim dhe kërkojmë një refektim më serioz, më të thellë dhe më të guximshëm nga Bashkimi Evropian.”
I pyetur mbi paqartësitë që ofron aktualisht skena politike në Kosovë, numri dy i qeverisë deklaron se partitë politike vijojnë konsultimet dhe se kandidatura e ish kryeministrit Ramush Haradinaj për pozicionin e kryetarit të shtetit, është mirëpritur.
“Kemi propozuar dhe kemi dhënë një ofertë politike që presidenti i ardhshëm i Kosovës të jetë Ramush Haradinaj, që ka vetitë që i duhen një udhëheqësi të vendit. Është një intelektual, një person, një lider me përgjegjësi të mëdha qeveritare, dy herë ka qenë kryeministër, që do të mund të ballafaqohet me të gjitha sfidat që Kosova mund t’i ketë në këtë kohë.”
Kryetarja e parlamentit, Vjosa Osmani do të ushtrojë edhe kompetencat e presidentit për 6 muaj, duke iu dhënë kohë partive politike të zgjedhin kreun e ri të shtetit. Nëse kjo nuk ndodh brenda këtij afati, atëherë kushtetuta parashikon mbajtjen e zgjedhjeve të parakohshme.
