Gjykata e Shkallës së Parë në Gjirokastër ka liruar nga qelia tre të arrestuarit pas vrasjes së 30-vjeçarit Endri Goxhaj më 21 prill në Memaliaj.
Në lidhje me këtë ngjarje janë shpallur në kërkim shtetasit Donald Nelaj dhe Marialdo Nelaj, të dyshuar për vrasje me dashje.
Dali Nela dhe Aldo Kalemi u arrestuan nga Policia për veprat penale “vrasja me dashje”, kryer në bashkëpunim, dhe “mbajtja pa leje dhe prodhimi i armëve shpërthyese dhe i municionit”, ndërsa Ermal Mataj u arrestua me akuzën për veprime që pengojnë zbulimin e së vërtetës.
Tashmë të tre do të hetohen me masën e sigurisë “arrest shtëpie”.
Nga hetimet ka rezultuar se gjatë përplasjes fizike, dyshohet se Endri Goxhaj ka qëlluar me armë zjarri në drejtim të Dali Nelës, duke e lënë këtë të fundit të plagosur.
Pas kësaj, dy vëllezërit Donald dhe Marialdo Nela kanë reaguar duke qëlluar me armë zjarri në drejtim të Goxhajt, i cili për pasojë ndërroi jetë gjatë transportimit për në spital.
/vizionplus.tv
