Ukraina në vështirësi përballë sulmeve ajrore ruse, Zelensky kërkon heqjen e kufizimeve të Starshield
Presidenti i Ukrainës, Volodymyr Zelensky, ka ngritur sërish alarmin mbi funksionimin e ngadalësuar të sistemit satelitor të internetit të nivelit ushtarak, Starshield, duke theksuar se kjo situatë po dëmton rëndë aftësinë e vendit për të bllokuar sulmet ajrore ruse.
Sipas kryetarit të shtetit ukrainas, “mbrojtja e jetëve dhe infrastrukturës energjetike të Ukrainës përpara dimrit varet drejtpërdrejt nga kjo”, ndërsa ka kërkuar nga zyrtarët vendas që të koordinohen ngushtësisht me qeverinë amerikane dhe kompaninë e Elon Musk për heqjen e kufizimeve.
Çështja e kufizimeve të shpejtësisë në terminalet Starshield, të cilat përdoren kryesisht për kapjen e raketave dhe dronëve në hapësirën ajrore, ka shkaktuar debate të gjata mes autoriteteve amerikane dhe atyre ukrainase.
Zelensky ka shpjeguar se kufizimet e shpejtësisë prej rreth 160 km/orë (100 mph), të vëna në disa zona, përfshirë territoret e pushtuara, po e bëjnë të pamundur përgjimin e mjeteve fluturuese.
Siç u shpreh Zelensky, “dronët tanë interceptorë humbasin lidhjen me operatorët e tyre me një shpejtësi prej 161 km/orë dhe thjesht nuk mund t’i kapin ‘shahedët’ me motor reaktiv rusë”.
Vendosja e kufizimeve të tilla vetëm në zonat e pushtuara nga Rusia ngre shqetësimin se kjo mund të interpretohet si një njohje e tërthortë e territoreve të humbura.
