Komisioneri për Zgjerimin, Oliver Varhelyi mbështeti paketën “Anti-KÇK” dhe Operacionin “Forca e Ligjit” me anë të të cilëve mazhoranca synon të luftojë krimin. Në një mëngjes pune që pati këtë të hënë me kryeministrin Edi Rama dhe ministrat e Jashtëm të BE, Varhelyi deklaroi se ligji special tregon lidership në luftën kundër krimit.
“Jo vetëm që kanë plotësuar kushtet, por shpejtësia e reformave është shtuar. Përgëzoj operacionin OFL. Ngrirja e aseteve të të dënuarve tregon lidership në luftën kundër krimit.”
Ndërsa ministri i Jashtëm i Italisë, Luigi Di Maio apeloi që të vlerësohet puna e bërë nga Shqipëria për hapjen e negociatave.
“Shteti i së drejtës duhet të mbetet gur themeli. Angazhimi ynë konfirmon se të gjithë jemi të vetëdijshëm se cfarë është në lojë, përfshirë edhe besueshmërinë e BE-së si aktor global. Integrimi i Ballkanit mbetet investimi ynë kyç strategjik për të paqen dhe stabilitetin në Europë. Lidhur me negociatat, hapja e tyre do të shënjojë vetëm fillesën dhe jo përfundimin e rrugëtimit europian, nuk mund të nënvlerësojmë ndikimin potencial të hezitimeve tona në Ballkan, sidomos kur bëhet fjalë për qëndrimet reformatore.”
