Kreu i qeverisë, Edi Rama, gjatë mbledhjes së Grupit Parlamentar të Partisë Socialiste, komentoi akuzat e opozitës për korrupsion dhe u ndal edhe te ngjarjet e 21 janarit, duke theksuar se katër viktimat ende presin drejtësi.
Rama ironizoi pretendimet e opozitës, duke theksuar progresin e vendit në fushën e prokurimeve publike.
Ai tha me ironi se vendi po rritet në të gjitha drejtimet falë korrupsionit.
Edi Rama: Katër varre të vrarësh janë ende në kërkim të drjetësisë, por nuk ka ngut as për të bërë kontrolle banesash, as për të ngritur akuzë për arsye që gjithkush mund t’i marrë me mendje në mënyrën e vet por ne nuk i dimë cilat janë. Ky është një fakt. Një fakt tjetër është që Shqipëria renditet nga Komisioni Evropian në vendin e parë në rajon për prokurimet publike, me diferencë nga vendi i dytë. Do të thotë që ka më pak korrupsion jo më shumë. Shqipëria e e-Albanias që i ka kursyer shqiptarëve, sipas një konsulenti ndërkombëtar, një radhë të gjatë sa 22 mijë rrotullime rreth tokës dhe thuajse 1 miliard euro nga xhepi për të gjitha llojet e situatave. Do të thotë që ka më pak korrupsion. Shqipëria rritet në çdo drejtim falë korrupsionit.
