Policë serbë në Shqipëri? Reagon Policia e Shtetit: Pretendime të pavërteta dhe dashakeqe
Policia e Shtetit rrëzon pretendimet e disa lajmeve në rrjetet sociale, ku thuhet se në protestën e 15 tetorit në Tiranë janë angazhuar punonjës policie nga Serbia.
Institucioni i ka cilësuar këto pretendime si të pavërteta dhe dashakeqe.
Në reagimin zyrtar, Policia e Shtetit shpreh keqardhjen për përhapjen e informacioneve që, sipas saj, synojnë të nxisin tensione dhe të dëmtojnë besimin e qytetarëve te uniformat blu.
Sipas Policisë, këto pretendime shfrytëzojnë ndjenjat nacionaliste për të krijuar një klimë konfliktuale në opinionin publik.
Policia e Shtetit sqaron se gjatë tubimit të zhvilluar më 15 tetor 2026, ashtu si në çdo protestë tjetër, janë angazhuar vetëm punonjës të Policisë së Shtetit, në bazë të planit të masave.
“Pretendimi për angazhimin e punonjësve të policisë nga Serbia është tërësisht i pavërtetë”, thekson Policia e Shtetit në reagimin e saj.
REAGIMI I POLICISË SË SHTETIT
Policia e Shtetit shpreh keqardhjen për përhapjen e lajmeve të pavërteta në rrjetet sociale, përmes të cilave pretendohet se në radhët e saj janë angazhuar punonjës policie nga Serbia.
Përhapja e këtyre pretendimeve tërësisht të pavërteta dhe dashakeqe synon të shfrytëzojë ndjenjat nacionaliste për të krijuar klimë konfliktuale dhe për të cenuar besimin e qytetarëve te Policia e Shtetit.
Policia e Shtetit sqaron se në tubimin e datës 15.10.2026, ashtu si në çdo tubim tjetër, janë angazhuar vetëm punonjës të Policisë së Shtetit, të planëzuar në shërbim në bazë të planit të masave. Pretendimi për angazhimin e punonjësve të policisë nga Serbia është tërësisht i pavërtetë.
