Një elefant i egër në Nepal, i njohur për sulmet vdekjeprurëse ndaj njerëzve, ka vrarë edhe dy anëtarë të së njëjtës familje që kishte goditur 14 vite më parë. Sipas mediave vendase, kafsha, e quajtur Dhurbe, sulmoi një 25-vjeçare dhe djalin e saj 4-vjeçar, pasi hyri në banesën e tyre në Jagatpur, rreth 17 kilometra larg vendit ku kishte vrarë më herët prindërit e familjes.
Ngjarja e parë kishte ndodhur në dhjetor të vitit 2012 pranë Parkut Kombëtar Chitwan, kur elefanti vrau çiftin e moshuar të familjes Bote. Pas asaj tragjedie, djali i tyre vendosi të shpërngulej bashkë me familjen në një zonë tjetër, duke besuar se do të ishte më i sigurt. Megjithatë, pas 14 vitesh, Dhurbe mbërriti edhe në vendbanimin e ri dhe sulmoi sërish familjen.
Sipas autoriteteve, Dhurbe ka vrarë gjithsej 25 persona që nga viti 2010, përfshirë katër anëtarë të familjes Bote. Banorët dhe ekspertët thonë se elefanti u bë agresiv pasi u dëbua nga tufa kur ishte ende i ri, duke jetuar më pas i vetëm dhe duke hyrë shpesh në zonat e banuara në kërkim të ushqimit.
Autoritetet nepaleze kanë tentuar disa herë ta neutralizojnë ose ta monitorojnë kafshën. Elefanti është pajisur disa herë me jakë satelitore për të ndjekur lëvizjet e tij, por sistemi transmeton të dhënat vetëm çdo një orë, duke e bërë të vështirë reagimin në kohë kur ai afrohet pranë vendbanimeve. Edhe pse pas një operacioni në vitin 2012 u mendua se ishte vrarë, Dhurbe u rishfaq në vitin 2016 dhe vazhdon të konsiderohet një nga kafshët më të rrezikshme në Nepal.
/vizionplus.tv
