Nga Blerina Cene
Vendimi i administratës gjyqësore për të bojkotuar seancat ka sjellë kolaps të sistemit pas bllokimit të pagave. Të enjten, në mbledhjen e jashtëzakonshme të gjyqtarëve, u vendos që ministri i Financave, Petrit Malaj, dhe numri dy i tij të kallëzohen në SPAK për shpërdorim detyre.
Por eksperti ligjor Rezart Kthupi pretendon se moslëvrimi i fondit të pagave nga ana e MF është në fakt një vepër penale. Nga ana tjetër ai thotë se bojktin nuk po e kryejnë magjistratët por administrate gjyqësore, që është në kushte emergjente për tu paguar.
“E vërteta është që gjyqtarët dhe prokurorët vazhdojnë të ushtrojnë funksionet e tyre. Do të ishte ky versioni klasik që gjyqtarët nuk bëjnë dot një gjë vetë, se e kanë të kufizuar, do të nxirrnin administratën shtetërore. Nuk e besoj se është kjo. Administrata gjyqësore është shumë herë më e ndjeshme se gjyqtarët ndaj efekteve financiare, të mospagesës. Fakti penal lidhet me pagat e gjyqtarëve, por me pagat e administratës gjyqësore, se janë pjesa më sensitive. Nëse gjyqtarët dhe prokurorët janë më pak të ndjeshëm, ndërkohë që sekretarët gjyqësorë, nëpunësit, ftuesit janë shumë më tepër”, tha Rezart Kthupi, avokat.
KLGJ dhe KLP nuk kanë pse të zbatojnë urdhrin e Gjykatës Kushtetuese, thotë avokati Kujtim Ibraj, pasi nuk kanë në dorë financat e shtetit.
“KLGJ dhe KLP kanë dalë jashtë binarëve kushtetues për kompetencat ligjore që ata kanë për indeksimin e pagave. Pagat i bën vetëm Parlamenti. Nuk mundet që KLGJ dhe KLP të marrin kompetencat e Parlamentit, sepse ata nuk janë financierë. Krijohet një projektbuxhet, një komision parlamentar, thirren ekspertët. Edhe GJK, kur është shprehur, i ka lënë detyrë Parlamentit, se këta kujtojnë që duhet të zbatojnë vendimin. Pse duhet ta zbatojnë këta vendimin? KLP dhe KLGJ kanë boll me çfarë të merren”, u shpreh Kujtim Ibraj, avokat.
Të dy juristët pranojnë se vendimi i GJK-së do të duhej të ishte zbatuar nga Kuvendi.
“Një sistem gjyqësor jep vendim për veten e tij në radhë të parë, pastaj për qytetarët. Kemi një vendim të Gjykatës Kushtetuese që e detyron Parlamentin brenda 6 muajve të merrte hapat ligjorë. Ne kemi një histori të habitshme në sjellje të Parlamentit me Gjykatën Kushtetuese, ku GJK merr vendime dhe Parlamenti vazhdon t’i injorojë”, tha Kthupi.
“Vendimi i Gjykatës Kushtetuese do të duhej të ishte zbatuar, sepse është vendim i gjykatës supreme. Ngërçi që është krijuar është ngërç institucional që nuk ka ndodhur ndonjëherë në historinë e drejtësisë shqiptare. Ministria e Financave nuk mund të bllokonte pagat, siç i kanë pasur më përpara, pastaj ngërçin ligjor do të duhej ta zgjidhte Parlamenti. Nuk mund ta bllokosh gjithë pagën, sepse njerëzit kanë kredi, nevoja familjare”, tha Ibraj.
Në shkurt të këtij viti, Gjykata Kushtetuese urdhëroi Kuvendin të miratojë një ligj të ri për pagat e magjistratëve deri më 31 korrik. Parlamenti nuk miratoi asnjë ndryshim dhe, në këtë situatë, KLGJ dhe KLP vendosën të zbatojnë drejtpërdrejt vendimin e Kushtetueses dhe të rrisin pagat e tyre.
/vizionplus.tv
