Endri Shabani deklaroi se nisma “Thurje” do të dalë e vetme në zgjedhjet e 25 prillit dhe nuk do të bashkëpunojë me asnjë forcë që i përket të shkuarës.
Teksa fliste mbi përgatitjet për zgjedhjet, Shabani tha në edicionin qendror të lajmeve në “Vizion Plus” se beteja e tyre politike do të shtrohet në të gjithë vendin.
“Ne jemi të gatshëm të bashkëpunojmë me çdo forcë të re që nuk ka qenë pjesë e vjedhjes që i është bërë Shqipërisë në këto 30 vite dhe nuk vazhdon që të përpiqet të marrë një ofertë pa u ndëshkuar për atë që iu ka bërë shqiptarëve. Ne nuk mendojmë që të bëhemi pjesë e së shkuarës. Në këtë pikëpamje, nuk mund të bashkëpunojmë me asnjë forcë që i përket të shkuarës. Ne mendojmë që çdo qytetar i Shqipërisë ka të drejtë që të ketë një alternativë. Shqetësimi ynë më i madh është se 50 për qind e qytetarëve nuk votojnë. Duke mos votuar, ne mbajmë në pushtet Edi Ramën dhe një establishment, i cili 30 vitet e fundit e kanë sjellë vendin ku është sot. Për këtë arsye, do të garojmë në të gjithë Shqipërinë.”
I pyetur se cilën shtresë përfaqësojnë në zgjedhje, Shabani nënvizoi se mund të konsiderohen populistë.
Ju jeni shprehur kundër forcave tradicionale. Por në fakt çfarë shtrese përfaqësoni ju në zgjedhje? Jeni majtas apo djathtas?
Shabani: Fatkeqësisht kemi një ndarje midis një grupi të vogël njerëzish që kanë kapur partitë politike dhe nga aty kontrollojnë shtetin dhe gjithë shoqërinë. Ne flasim për atë pjesë të shoqërisë që sot nuk arrin të ecë përpara në jetë, nuk arrijnë të bëhen mjekë, pedagogë, të hapin një biznes, sepse kudo është vrarë gara. Është bërë e pamundur për të avancuar në jetë. Ne duam që zërin e këtyre qytetarëve ta çojmë në Parlament.
Jeni një lloj lëvizje populiste?
Shabani: Po. Nëse populizmi do të quhej përfaqësimi i pjesës më të madhe të shoqërisë përballë një elite që i ka vjedhur të ardhmen shoqërisë, po, ne jemi lëvizje populiste. Ne jemi i vetmi subjekt politik në Shqipëri që kemi një manifest politik, të cilin e kemi nxjerrë që në vitin 2019. Ne kërkojmë kufizimin e monopoleve, dhënien fund të privatizimit të pasurisë publike, duke krijuar mundësinë që qytetari të ketë pushtet mbi politikanin. Të dobësojmë kryetarët e partive dhe të fuqizojmë qytetarin. Ne duam ta çomontojmë këtë sistem që i shërben vetëm 4 a 5 njerëzve dhe kostot po i paguan një popull i tërë. Ambicia jonë është për të transformuar Shqipërinë. Ne kemi hartuar 33 projektligje, nuk po garojmë për një alternativë qeverisëse, por ligjvënëse. Ne duam të çojmë zërin e qytetarit në Parlament. Plani jonë: nuk do të bëjmë koalicion me asnjë forcë tjetër.
