Papa Françesku po zhvillon ditën e dytë të vizitës së tij në Irlandë. Ndërsa po zhvillohen përgatitjet për mbajtjen e meshës për 600 mijë besimtarë në Dublin, shumë të tjerë kanë protestuar kundër abuzimit seksual të priftërinjve.
Protestat vijnë pas skandaleve të lidhura me Kishën. Pjesëmarrja në Kishën e Irlandës është zvogëluar nga 90% që ka qenë dikur në rreth 30%, pas zbulimit të abuzimeve seksuale nga institucionet katolike, ngjarje këto që vazhdojnë të dëmtojnë autoritetin e saj moral dhe të zvogëlojnë ndikimin tek njerëzit.
Një ditë më parë Papa Françesku kërkoi falje për abuzimin seksual ndaj fëmijëve në Kisha dhe i quajti ato, akte kriminale të pështira. Ndërsa kryeministri irlandez bëri thirrje për zero tolerancë kundër priftërinjve që kanë ndërmarrë këto veprime.
Në vitin 1979, kur Papa Gjon Pali II vizitoi Irlandën, ajo ishte e lidhur shumë me besimin katolik. Një milion e gjysmë besimtarë morën pjesë në meshë dhe në atë kohë, as që mendohej të kishte protesta ndaj vizitës së Papës.
Por sot skandalet kane ndryshuar gjendjen. Në Dublin janë instaluar nëntë stenda prej druri me të dhënat e fëmijëve të dhunuar nga priftërinjtë.
Rënia e Kishës Katolike në Irlandë filloi në vitet 1990, kur skandalet e para të abuzimit me priftërinjtë katolikë dolën në dritë.
