Juristi Ermal Yzeiraj e ka cilësuar arritjen e një marrëveshjeje mes Shqipërisë dhe amerikanëve për ishullin e Sazanit si një investim gjigant.
I ftuar në Quo Vadis të moderatores Pranvera Borakaj në Vizion Plus, Yzeiraj tha se investime të tilla në Shqipëri do t’i shërbejnë vendit shumë në të ardhmen.
I pyetur nëse ka konsensus në aspektin ligjor për marrëveshje të tilla, Yzeiraj tha se kjo marrëveshje është e dyfishtë ligjërisht, pasi nuk do të jetë vetëm shteti shqiptar, por edhe investitori amerikan.
Pjesë nga biseda:
Borakaj: Kur flitet për pasuri publike me vlera kaq të mëdha për vendin, në aspektin ligjor, çfarë lloj konsensusi duhet të ketë?
Yzeiraj: Në lidhje me detajet e një projekti të mundshëm në ishullin e Sazanit nuk kam dijeni se çfarë do të ndiqet në rastin konkret. Në kushtet ku jemi me SPAK-un që ndërhyn herë pas here, besoj se kuadri rregullator do të zgjidhet me kujdes. Kemi të bëjmë me një investim të madh, i cili vetë si investim jep garanci ligjore shumë solide. Veç palës shqiptare kemi edhe palën tjetër investuese, e cila do ta shikojë me seriozitet të madh gjithë bazën ligjore.
Borakaj: Jemi ne kaq atraktivë për investitorë kaq të rëndësishëm?
Yzeiraj: Marketingu është shumë i mirë. Investime të tilla gjigante, edhe aeroporti që është një vlerë e shtuar, besoj se tregojnë një nivel goxha të lartë.
