Zhurma në Kuvend për ftesën e Trump ndaj Ramës dhe më pas votimi me konsensus për marrëveshjen e Bordit të Paqes ishte pika e diskutimit këtë të enjte në studion e Quo Vadis të moderatores Pranvera Borakaj në Vizion Plus.
I ftuar në studio, analisti politik Endri Tafani tha se ajo që e çuditi ishte fakti se asnjë nga opozitarët nuk ngriti pyetjen po sikur kjo organizatë e re të shkojë kundër interesave të BE-së, a rrezikon Shqipëria?
Ndërsa eksperti i ekonomisë Azmi Stringa tha se politika shqiptare është vetëm në teori proamerikane, pasi në vepra nuk e ka treguar këtë gjë.
Pjesë nga biseda:
Tafani: A do të ketë kosto kjo gjë për ne në BE? Gjëra të tilla nuk u diskutuan fare në Kuvend. Përveç pjesës që faturën financiare nuk e di askush.
Stringa: Pyetja që do të shtroja unë, që është elefanti në dhomë: pse është kjo nevojë kaq e madhe e forcave politike shqiptare për të treguar mbështetjen e tyre ndaj SHBA-ve? Pra, ose do të çohet mesazhi që ne jemi proamerikanë dhe “po bëjmë çdo gjë, na lini në pushtet”, ose Amerika të na lërë të bëjmë ndryshime në reformën në drejtësi.
Borakaj: Të bërit gjithçka që do Amerika, ndikon në SPAK?
Stringa: Zelli ynë pro Amerikës është i jashtëzakonshëm, por me vepra klasa jonë politike nuk është proamerikane.
