Vrasja e 49-vjeçarit shqiptar Jani Aliaj në burgun e sigurisë së lartë të Korydallos ditën e hënë është trajtuar sërish këtë të enjte nga mediat greke.
Media greke ANT1 raporton se Aliaj, për një periudhë kohe ishte transferuar në burgun e grave, pasi kishte informacione për eliminimin e tij.
“Duke pasur parasysh se kishte informacione se kundër tij ekzistonte një kontratë vdekjeje, ai ishte transferuar në burgun e grave pak kohë më parë, për arsye mbrojtjeje. Papritmas, pak kohë më parë, u vendos që ai të transferohej përsëri në degën kryesore të burrave, pra në burgun e burrave, pa justifikim.”, thuhet në raportimin e ANT1.
Sipas medias greke, Aliaj qëndroi për pak kohë në burgun e grave dhe më pas kaloj sërish në ambientet ku ka qenë, por theksohet se pavarësisht informacioneve që ishin për eliminimin e tij, nuk u mor asnjë masë shtesë.
“Dy muaj më parë ai mori sulmin e parë vrasës kundër tij në burg dhe i shpëtoi mezi. Edhe atëherë, edhe pse ishte e qartë se ai do të vritej, nuk u morën masa mbrojtëse. Ai u la aty, ku fusha ishte padyshim e hapur për vrasësit e tij të mundshëm”./vizionplus.tv
