Politika dhe drejtësia, kjo ka qenë tema e diskutimit mbrëmjen e sotme në Quo Vadis të moderatores Pranvera Borakaj në Vizion Plus.
I ftuar në studio gazetari Arbër Hitaj u shpreh se ka ardhur koha që PS të ndryshojë qasje ndaj zyrtarëve që kanë akuza nga drejtësia.
Sipas tij, PS duhet të largojë nga pozicionet drejtuese të gjithë ata zyrtarë që kanë procese gjyqësore.
Hitaj tha se askush nuk mund të ulet në tryezë me përfaqësuesit e BE, për sa kohë kanë një proces gjyqësor.
“Unë mendoj që PS në gjithë këto vite qeverisje duhet të ketë një qasje të re. Të gjithë ata ministra apo kryetarë bashkish që kanë punë me drejtësinë të mos zgjidhen më në detyra drejtuese. Sot tha kryetari i grupit të PS, që vitin tjetër do të kërkojmë nisjen e procesit të anëtarësimit. Tani nuk mundet që njerëz që kanë proces gjyqësor të jenë në tryezë me njerëz të BE. Njerëz që kanë akuza zyrtare nga drejtësia nuk duhet të kenë më pozicione drejtuese”, u shpreh Hitaj.
