Gjermania është skuadra e parë që u kualifikua për në Botërorin e ”Katar 2022”. Pancerat u hakmorën përballë Maqedonisë së Veriut dhe triumfuan me rezultatin e pastër 4-0.
Një lojë fantastike e Hansi Flick, që dominoi thuajse për 90 minuta me shumë mundësi për të shënuar.
Në pjesën e parë maqedonasit bënë gjithçka për të mbrojtur portën, ndonëse gjermanët patën rastet e tyre, fati nuk ishte ta. Ndërsa e dytë ishte një furtunë për skuadrën e Flick, që realizoi 4 herë.
Festivali i golave u hap në minutën e 50 me talentin Kai Havertz, ndërsa pas tij Timo Verner dy herë, gjunjëzuan Maqedoninë që shihte veten të dorëzuar. Musala i dha dhe goditjen përfundimtare skuadrës maqedonase.
Në grupin J kualifikimin në Play Off-in e botërorit mbetet akoma në diskutim mes Rumanisë dhe Maqedonisë së Veriut. Rumunët bënë detyrën në duelin ndaj Armenisë, pasi fituan me rezultatin minimal 1-0, duke marrë kështu vendin e dytë në grup, 1 më shumë se Maqedonia kur kanë mbetur dhe dy ndeshje për tu luajtur.
Nga ana tjetër, surpriza ishte Kroacia që nuk shkoi më shumë se një barazim 2-2 ndaj Sllovakisë.
Një barazim zhgënjyes ky për kroatët, që humbasin dhe vendin e parë në grup duke u kaluar nga Rusët, që më herët mposhtën Slloveninë me rezultatin final 2-1.
Edhe Holanda ishte e pamëshirshme përballë Gjibraltarit pasi fitoi me goladë 6-0 në shtëpi. Një triumf me rëndësi ky për tulipanët, që ruajnë vendin e parë në grup me 19 pikë, dy më shumë se Norvegjia e vendit të dytë.
