Franca është vendi i katërt në botë që regjistron më shumë të vdekur dhe të infektuar nga covid 19 pasi numri i përgjithshëm i viktimave i tejkaloi 10 mijë. Në total janë rreth 110 mijë pacientë të infektuar ndërsa zonat më të prekura janë Parisi dhe Franca Lindore. Bilanci u rrit ndjeshëm pas zbulimit të vdekjeve masive në azilet e pleqve. Kreu i institutit të shëndetit publik, Jérôme Salomon tha se epidemia po vazhdon përparimin e saj drejt kulmit.
Parisi dhe qytete të tjera tashmë kanë mbyllur parqet dhe kopshtet publike si pjesë e bllokimit mbarëkombëtar që ka filluar nga data 17 mars dhe do të zgjasë të paktën deri më 15 prill.
Ndërkohë situata është përkeqësuar edhe në Gjermani ku numërohen mbi 2 mijë të vdekur dhe rreth 108 mijë të infektuar. Bavaria dhe Baden-Wuerttemberg , dy shtetet jugore më të afërta me Italinë, janë goditur më shumë nga kriza. Shkalla e vdekshmërisë në Gjermani llogaritet 1.8 përqind, që do të thotë afërsisht një vdekje për çdo 56 raste të konfirmuar. Shkalla e ulët mendohet të jetë e lidhur me testimin në masë, 500,000 njerëz kontrollohen për virusin çdo javë.
Ndërkohë Austria dhe Danimarka po konsiderojnë planin e daljes nga izolimi në dy javët e ardhshme ndërsa Italia dhe Spanja edhe pse kanë njohur rënie të konsiderueshme të shifrave vijojnë të mbeten nën masa të forta kufizuese.
Në vendet e rajonit, Greqia, Serbia dhe Maqedonia e Veriut janë më të prekurit duke raportuar balance në rritje të vdekjeve deh infeksioneve nga koronavirusi.
