Ministri i Mbrojtjes, Niko Peleshi deklaroi se këtë të hënë ka lindur nevoja për të evakuuar disa familje në Sukth për shkak të përmbytjeve. Ai tha gjatë intervistës për “Quo Vadis” në “Vizion Plus” se forcat e ushtrisë janë në terren për të dhënë ndihmë në zonat ku është e nevojshme.
“Sot ka qenë e nevojshme ndërhyrja e forcave të ushtrisë në Sukth, Shijak, ku janë akomoduar dhe evakuuar me varka disa familje. Jemi në gatishmëri, present në këto zona që sot janë nën ujë, janë disa qindra hektarë nën ujë. Emergjenca Civile nuk është përgjegjësi vetëm e një institucioni. Edhe bashkitë, shtabet, prefekturat hyjnë në lojë.”
Ai shtoi se skenari më i keq i reshjeve të shiut dhe përmbytjeve nuk ndodhi. Gjatë ditëve në vijim, vazhdoi më tej ministri, pritet një përmirësim i situatës.
